Já en það sem hækkaði mest var...

Nýr bíll og varahlutir um 10,61% og innfluttar mat- og drykkjarvörur um 9,15%. Þær hækka meira en eldsneyti t.d. og meira en landbúnaðarvörur....

Þetta eru skelfilegar verbólgutölur.

„Verðbólgutölur skelfilegar"

Kemur ekki beint á óvart...

og engin von um vaxtalækkun á næstunni... Maður verður líklega að reyna að fá lán í Óláni næst...

Mesta verðbólga í tæp 18 ár

Ég og strákarnir...

Þetta er búið að vera ljúf helgi. Í gær fór ég með þremur strákum í reiðtúr. Herra Þytur var í reiðkennslunni og sýndi knapanum hvernig góður hestur geysist á yfirferðartölti. Við skötuhjúin, ég og Spori, sátum eftir í jóreyknum . Í dag fór ég ein með þá félaga, Þyt og Spora, í reiðtúr kringum Rauðavatnið. Þvílíkur vordagur, sól og blíða. Geisli var tekinn í lónseringu og allir fegnu verðlaun. Á eftir var bíllinn þrifinn. Við félagarnir í hesthúsinu höfum fengið þá hugmynd að skella okkur í "sleppitúr" á Stakkhamar um mánaðamótin maí/júní og kanna fjörurnar. Ja, það gæti nú bara orðið gaman. Þarf að finna nokkrar myndir og stinga hér inn á bloggið svo fólkið fái hugmyd um hvað það er að fara út í....

Kartöflukonfekt ... tær snilld

Á miðvikudaginn var ég þeirrar ánægju aðnjótandi að vera boðin í smá boð hjá einni af frægustu sveitastelpum Íslands. Uppistöðuhráefnið í veitingunum var kartöflur þar á meðal kartöflukonfekt!  Eitt það frumlegasta sem ég hef smakkað úr kartöflum og bragðaðist afar vel

Fjárborg í herkví?

"Mamma! Það var eins gott að við fórum  ekki í hesthúsið í dag." Þetta sagði yngri erfinginn eftir að við horfðum á kvöldfréttir og Kastljósið. "Hestarnir hefðu orðið hræddir!". Já hestunum hefði eflaust brugðið í brún ef við hefðum farið nálægt þessum atburðum. Við erum óvön svona sjón hér í okkar litla friðsæla landi, enn ein áminning um hve gott við yfir höfuð höfum það hér á Fróni. Við munum rannsaka ummerkin eftir eggjakastið á morgun. Eitthvað fór úrskeiðis í morgun. Lögreglan þarf að hafa sín mál á hreinu en mótmæli verða líka að lúta tilteknum reglum.

Mótmælin fóru úr böndunum

Meiri heilsan...

Annan daginn í röð ligg ég inni í bóli borin ofurliði af kvefpest einhverri. Vorið kallar þó áfram. Sé að Suðurlandsvegur er lokaður við Rauðavatn, Fjárborg í herkví semsagt. Smári hefur verið útskrifaður af "upptökuheimilinu". Hann er víst hættur að prjóna og orðinn efni í keppnishest . Hann verður sendur í næstu sveit í framhaldinu, ráðinn í hólmaferðir og fjöruskoðun á Stakkhamri. Pabbi ætlar að sækja hann á morgun.

Sumardagurinn fyrsti bíður svo á morgun. Alltaf gaman að fá einn frídag til að fagna vorinu. Hann má nota til útreiða, grilla eða bara hvað sem er jafnvel taka til á pallinum. Best að skjóta í sig slatta af panodil og sjá hvort upplitið hressist ekki.

Litli Rauðhausinn minn...

Gæludýr geta verið ótrúlega elsk að eigendum sínum. Ég hélt að hundar væru í sérflokki hvað þetta varðar en er búin að komast að því að kettir geta verið mjög sérstakir líka. Fröken Skotta hér í næsta húsi varð skyndilega draghölt þegar eigandinn fór á hækjur eftir fótbrot um daginn. Ekkert amaði að kisu hins vegar. Sjálf ligg ég í bólinu í dag í kvefi og hita. Rauðhausinn minn er "fárveikur" með mér, hann er búinn að liggja við hliðina á mér og steinsofa síðan átta í morgun. Þetta kallar maður að sýna samkennd í verki...

Sammála Þráni Bertelssyni...

Ég les oft skrif Þráins Bertelssonar í Fréttablaðinu og sleppi aldrei bakþönkunum hans. Í gær tók hann fyrir ummæli Geirs Haarde á aðalfundi Samtaka atvinnulífsins. "Mikil opinber umræða getur verið óheppileg, skapað óraunhæfar væntingar og þar með haft neikvæð áhrif". Eigum við sauðsvartur almúginn semsagt bara að sitja heima og horfa á sápuóperur í sjónvarpinu og bíða eftir að ráðamönnum þóknist að stíga út úr glerhúsum sínum og dreifa einhverjum dúsum og molum af borðum höfðingjanna til okkar. Nei þetta er ósköp einfaldlega hluti af því að búa í lýðræðisþjóðfélagi að opinber umræða um hver þau mál sem efst eru á baugi, getur farið fram. Vill einhver skipta????  

Vorvindar glaðir...

glettnir og hraðir...

Þannig byrjar skemmtilegt vorkvæði sem börnum er kennt í leikskólum. Einstaklega glaðlegt og fullt af litríkum orðum. Nú er þessi árstími einmitt að renna upp. Við ég og erfingjarnir höfum stundað hestamennskuna af meira en áður enda Kári og Stormur loksins hættir að ráða ríkjum í Hólmsheiðinni, það er frekar að Blær og Gola séu þar á ferðinni. Lóa litla og hrossagaukurinn eru farin að sýna sig í heiðinni, hjartað tók aukahopp um daginn þegar ég heyrði þytinn í gauknum í fyrsta skipti á þessu vori.

Síðast í kvöld skutlaði ég erfingjunum uppeftir og þær skelltu sér í reiðtúr á herra Þyt og Spora. Sjálf hef ég verið að skrölta við að halda áfram að temja Geisla litla, en sleptti reiðrúr í kvöld út af kvefi. Hrafnhildur hefur unnið gott verk með strákinn. Hún byggir á tamnigar sínar aðferð Mounty Roberts, "Af frjálsum vilja". Mikilvægur hluti er að bera virðingu fyrir þjálfaranum. Ég rokprófaði hann á fimmtudaginn og hann stóðst það með prýði. Í gær fór hann í fyrsta skipti niður i Víðidal og jújú ekki málið að fara á undan lífsreyndari hestum á refilstigum þar. Svo óð hann í fyrsta skipti yfir Hólmsánna, jú mamma ekki málið fyrst þú biður svona fallega! Semsagt, góður strákur hann Geisli.

Núna er hins vegar kominn annar góður strákur í bólið mitt, litli rauðhausinn er mættur til að þiggja knús og klapp. Eins gott að nýta færið meðan "Stóri-Moli" er hvergi nálægur...

Er þetta ekki...

besta mál?

Íbúðalánasjóður lækkar vexti