Enginn ósnortinn...

Fjáröflunn handboltakappans er hafin. Úrvals EDET WC-pappír á boðstólum sem lætur engan ósnortinn

Tekið við pöntum á Kærleiksheimilinu í Grænumýri.... 

Lausafé smalað...

Í dag var stóri dagurinn. Mæting kl. átta í Baðhúsið í Fjárborg. Þar biðu borð hlaðin smurðu brauði og kökum. Þegar allir höfðu troðið vambir sínar vel var hrossum raðað á bíla og ekið upp á Nesjavallaveg til móts við Mosfellinga sem smala norður af afréttarlandinu. Ég naut þess að fá sama hest og í fyrra hann Gjafar frá Kyljuholti. Hann er frábær reiðhestur og það sem enn betra er, kann til verka í smalamennskum.

Smölunin gekk þokkalega, mætti þó segja fólki meira til í upphafi til hvers er ætlast af því. Nokkuð af fé gafst upp eða var með óþekkt enda sumt í tveimur reifum blautt og þungt. Gjafar mátti nokkrum sinnum taka á því en við náum vel saman og óþekktarskjáturnar máttu lúta í lægra haldi fyrir okkur og öðrum lausafjársmölum. Til að krydda daginn fengum við tvö hressileg haglél á okku, sussu seí.

Niður í rétt vorum við komin milli 3 og 4 og þegar aftur var komið í Baðhúsið beið salkjöt og baunir, súkkulaðikaka og kaffi.  Frábær dagur og gaman að taka þátt í þessu verkefni.

Evran í gær...

Jæja hefði nú ekki verið tilvalið að taka upp Evru í gær  Hvað ætli þjóðarbúið fái mikið fleiri Evrur í dag fyrir krónurnar sínar.

Höfðuatriði er að auka tiltrú á krónunni um þessar mundir og það verður ekki gert með því að klifa stöðugt á að hún sé ekki nógu góð fyrir okkur. Hinum títt nefndu sérfræðingum væri nær að snúa sér að því.

Krónan styrkist um 3,17%

Enn um kastljós...

Viðtal Jóhönnu Vilhjálmsdóttur við Össur Skarphéðinsson í gærkvöldi er enn eitt dæmið um lélega fréttamennsku þar á bæ. Össur rak viðmælanda sinn hvað eftir annað á gat og skríkti svo af ánægju yfir því. Jóhanna klikkti svo út með að segja : “Það er ofboðslega gott og uppbyggjandi að heyra þessi orð." þegar ráðherrann lét dæluna ganga um bjartsýni sína og réttsýni. Góð færsla á jonas.is um þetta.

Nær væri að nota eitthvað af fjármunum RÚV í að texta fréttir fyrir heyrnarskerta eins og bent er á í leiðara mbl í dag.

Vandmeðfarin karfa...

Enn heldur ASÍ áfram að birta verðbreytingar á ímyndaðri matarkörfu sinni. Þetta eiga að vera einhverskonar ímynduð helgarinnkaup hjá ímyndaðri fjölskyldu. Þessi fjölskylda kaupir alltaf sama kjötið (lambalæri í helgarmatinn), sama brauðið o.s.frv. Þessir útreikningar eru því villandi um heildarverðþróun á matvörum. Vísitala neysluverðs er hins vegar háþróað tæki til þess brúks sem tekur tillit til verðbreytinga á margfalt fleiri vörutegundum og leitast þannig við að endurspegla öll matvöruútgjöld heimilanna, ekki bara helgarinnkaupin.

Hvað verðsamanburð og breytingar milli verslanir varðar eru þeir augljósu annmarkar að verslanir vita hvaða vörur eru í þessu og er þar að auki í lófa lagið að hækka verð þeirra strax og birting þessara upplýsinga ASÍ hefur farið fram. Það er nefnilega svo að verlsanir eru sífellt að breyta verði (samanmber færslu mína um rangar hillumerkingar) og um leið því á hvaða vörum þær taka helst inn tekjur sínar.

Neytendur verða með öðrum orðum að vera sjálfir virkt aðhald verslana.

Matarkarfan hækkar um 5-7%

Enn af fréttamati...

Hvenær ætla fjölmiðlar að hætta að lepja lapþunnar skýringar greiningadeildanna á efnahagsstöðunni. Af hverju er ekki talað við óháða aðila eins og hjá Háskólunum, Friðrik hjá Háskólanum í Reykjavík eða sérfræðinga á Hagfræðistofnun. Ef eignir heimilanna jukust um 32% á sama tíma og hlutabréf hækkuðu um 34% að meðaltali á ári (2004-2007) og húsnæðisverð um tugi prósenta, ja þá væri eitthvað skrýtið ef eigninrnar ykjust ekki. En hvað gerist þá þegar eignir heimilanna lækka vegna þessa að helstu eignir þeirra rýrna í verði af markaðsástæðum einum. Jú eignir rýrna en skuldir halda áfram að hækka ... og hækka.... og hækka vegna verðtryggingar og vísitala neysluverðs heldur jú áfram á uppleið meðan krónan er í frjálsu falli. Í efnahagsreikningi heitir þetta að eigið fé rýrni. Ég ætla ekki að selja húsið mitt eða bílinn til að borga skuldirnar en þegar ég tók lán til húsnæðiskaupa reiknaði ég alls ekki með að verðtryggingin ein myndi hækka skuldirnar um milljónir á ári.

Staða heimilanna afar góð

Neytendavarsla....

Í verðbólgunni sem nú geysar hækkar vöruverð í verslunum ört. Ég hef hvað eftir annað orðið fyrir því að annað verð en merkt hilluverð, er innheimt á kassa. Ég brýni neytendur til að gefa ekki eftir að að láta leiðrétta svona sem og að bera saman kassastrimla og hilluverð. Aðhald neytenda nú er mjög mikilvægt. Enn meira pirrandi er þó þegar helgartilboð eru merkt á hillum, fram í vikuna á eftir en gilda síðan ekki við kassa. Síðast í gær lét ég leiðrétta slíkt í Melabúðinni, sem annars er mín uppáhaldsverslun því hvergi sem ég þekki til er annað eins vöruúrval á fermetra.

Stöndum þétt saman og snúum bökum saman....

Hver er spurningin?

Fyrirtæki sem selja þjónustu við að gera skoðanakannanir eru líka sérfræðingar í að semja spurningar, um hvað er spurt og hvað er ekki spurt.

Er spurt hvort viðkomandi vill ESB - aðild?

Er spurt hvort viðkomandi finnst ástand efnahagsmála óþolandi?

Er boðið upp á aðrar leiðir til lausnar á því? Kannske nýja ríkisstjórn?

Fyrir mér er fréttin engin og vitna ég þar m.a. til viðtals í Fréttablaðinu í dag við sænskan ráðherra sem ítrekar enn og aftur að evru aðild án ESB aðildar sé óraunhæfur möguleiki. Reyndar spyr ráðherrann undir rós hvort nálgun Íslendinga að umræðu um ESB aðild sé ekki á þeim nótum að þeir

vilji fá að plokka kostina út......

Meirihluti vill evru hér á landi

Er þetta kreppa...?

Gengisvísitalan stendur í 171, 4 þegar þessar línur eru skrifaðar. Fyrirtækin í landinu hækka vörur sínar á hverjum degi til að mæta gengisfalli krónunnar. Ég lét t.d. gera við Oktavíu í síðustu viku fyrir 120 þús. kall. Ostaslaufan í bakaríinu er komin í 220 kr en kostaði 170 kr í fyrravetur ef ég man rétt. Ég sé engin merki um að verðbólga sé á niðurleið í þessu ástandi. Lánin mín eru verðtryggð. Í 15% verðbólgu á ári hækka 10 millj. kr. um 1.500.000 kr. Þetta er fjármálakreppa fyrir venjulegt launafólk sem þarf að framfleyta sér af launum sínum, rekur ekki fyrirtæki til að lauma einkaneyslu inn í sem kostnaði eða selur vinnu sína á svörtum markaði.

Veltan í smásölunni í sumar er án efa að hluta til borin uppi af erlendum ferðamönnum sem allt í einu uppgötvuðu að allt var orðið ódýrt á Íslandi. Sumir slepptu að fara í "Gullna hringinn" og Bláa lónið en skelltu sér í staðinn á útsölur í Kringlunni og fóru hlaðinir pinklum heim á leið.

Krakkar mínir ... þetta bara getur ekki gengið svona

Eimskip lækkar um 25%

Styttist í réttirnar...

Jæja þá er ársbið senn á enda, Lilla er búin að banka í mig og bjóða mér í göngur og réttir. Ég hlakka strax til. Það er eitthvað svo sérstakt við það að fara upp í heiðar til að smala saman kindum. Þó það sé bara nokkurra klukkutíma smölun. Í fyrra fékk ég hann Gjafar þeirra Lillu og Péturs lánaðan, hann er alveg ekta hestur í svona verkefni. Ég varð aftur 17 ára að smala á honum Sindra mínum, í huganum. Smalað verður í Húsmúlarétt við Kolviðarhól n.k. laugardag en hingað til hafa Reykvíkingar réttað í Lögbergsrétt. Það er nú eftir að sjá hverngi fólki og fénaði líkar þetta fyrirkomulag.

Af strákunum mínum (Spora, Geisla og Smára) er það að frétta að þeir eru komnir í hausthagana í Stakkhamarsnesinu. Vonandi eru þeir með hana Kviku litlu undir sínum verndarvæng. Þerna er líka með þeim. Hún er fylfull við stóðhestinum Hvessi frá Ásbrú sem er undan Sömbu frá Miðsitju og Þóroddi frá Þóroddsstöðum. Ekkert smá gengabúnt pilturinn sá. Það verður gaman að hlera eftir hvernig hann kemur út í tamningu.