Lausafé smalað...

Í dag var stóri dagurinn. Mæting kl. átta í Baðhúsið í Fjárborg. Þar biðu borð hlaðin smurðu brauði og kökum. Þegar allir höfðu troðið vambir sínar vel var hrossum raðað á bíla og ekið upp á Nesjavallaveg til móts við Mosfellinga sem smala norður af afréttarlandinu. Ég naut þess að fá sama hest og í fyrra hann Gjafar frá Kyljuholti. Hann er frábær reiðhestur og það sem enn betra er, kann til verka í smalamennskum.

Smölunin gekk þokkalega, mætti þó segja fólki meira til í upphafi til hvers er ætlast af því. Nokkuð af fé gafst upp eða var með óþekkt enda sumt í tveimur reifum blautt og þungt. Gjafar mátti nokkrum sinnum taka á því en við náum vel saman og óþekktarskjáturnar máttu lúta í lægra haldi fyrir okkur og öðrum lausafjársmölum. Til að krydda daginn fengum við tvö hressileg haglél á okku, sussu seí.

Niður í rétt vorum við komin milli 3 og 4 og þegar aftur var komið í Baðhúsið beið salkjöt og baunir, súkkulaðikaka og kaffi.  Frábær dagur og gaman að taka þátt í þessu verkefni.

Athugasemdir

[Anna Einarsdóttir, 21.9.2008 kl. 11:00]

Namm, saltkjöt og baunir.   

Menn eru afskaplega misjafnir smalar.  Sumir bara spá ekkert í hvað dýrin gætu hugsanlega verið að hugsa.    Ég verð að beita mig hörðu til að öfunda þig ekki af þessum degi.  Þetta hefur augljóslega verið frábært.

[Erna Bjarnadóttir, 21.9.2008 kl. 13:42]

Sæl Anna, já þetta var frábær dagur í einu og öllu. Vona að ég sé hér með orðin áskrifandi af að taka þátt í þessu hjá vinum mínum Lillu og Jens Pétri.