sneru taflinu við...

Voru þeir á skákmóti????

KR sneri taflinu við gegn Fjölni

Norrænir bændur sýna samhug og stuðning

Í dag barst formanni Bændasamtaka Íslands bréf frá formönnum samtaka bænda á hinum Norðurlöndum. Þar er lýst stuðningi við íslenska bændur á erfiðum tímum og stjórnvöld hvött til að standa við bakið á landbúnaðinum. Ég er búin að taka þátt í norrænu samstarfi bænda fyrir hönd Íslands í níu ár og það hefur verið einstaklega gaman. Oft hef ég þurft að svara spurningum um íslenska "efnahagsundrið" og fékk að heyra viðvörunarorð ekki síst frá vinum mínum í Finnlandi sem sögðu: Þetta er alveg sama staðan og var í aðdraganda kreppunnar hjá okkur. Það er gott að finna vináttu þeirra á þessum tímum.

Frekja og hroki aðgangsorð íslenska helvítisins

Kynlífsbúð - arkitektastofa - Verslunin Herðubreið

VERSLUNIN HERÐUBREIÐ OPNAR

 

Áður en húsnæðinu að Barónsstíg 27 var breytt í teiknistofu, á hátindi góðærisins 2006, hafði margvísleg starfsemi átt þar heimili, allt frá herrafataverslun til verslunar með kynlífshjálpartæki. En nú er "risið" sem arkitektastofan fékk í veganesti byrjað að hníga vegna efnahagshrunsins.

 

Skapa & Skerpa arkitektar hyggjast því bíða kreppuna af sér í vari, í kjallara húsnæðis síns, en opna Verslunina Herðubreið á jarðhæð, í samvinnu við Bryndísi Sveinbjörnsdóttur fatahönnuð.

Í versluninni verður til sölu margs konar áhugaverður varningur, svo sem íslensk fatahönnun fyrir bæði börn og fullorðna, skart og fylgihlutir,rabbabarakaramella beint frá býli, myndlist, tónlist og bækur.

 

Verslunin Herðubreið opnar laugardaginn 29. nóvember kl. 13.

 

Ég óska Elínu og viðskiptafélögum hennar til hamingju með verslunina og óska þeim góðs gengis. Áfram Ísland og íslensk hönnun

Garri mættur...

Spori hringdi í mig í gær og sagði að hann væri að verða býsna svalur á þeim Smellu, en við hlýjum bara hvort öðru bætti hann svo við. Hann var hins vegar uggandi yfir umræðum um umsókn um aðild að ESB. "Er heyið ekki langódýrast á Íslandi - spurði hann -  heldurðu að við fáum ESB verð á heyi?" Sjálf hef ég þvegið norsku ullarnærfötin og sett kuldagallann á vísan stað. Hann er eitthvað svo napur þessa dagana

Loksins...

Alþingi hefur lengi verið í einskonar afgreiðslustörfum fyrir framkvæmdavaldið. Öflugur meirihluti virðist enn frekar hafa ýtt undir afgreiðsluhraðann. Þó seint sé eru það góð tíðindi fyrir almenning að stjórnarþingmenn virðast ekki sætta sig lengur við þessa stöðu.

Þingmenn eins og afgreiðslufólk á kassa

Lamaður tími...

Síðasti mánuður hefur verið nánast sem lamaður tími. Á nánast hverjum degi hafa komið fram upplýsingar eða fréttir sem gera mann orðlausan. Stjórnmálamenn segja ósatt af stöðu mála, fréttir af afskriftum skulda bankamanna settu þjóðfélagið á annan endann í gær, menn sem grátbáðu um hjálp IMF koma síðan og láta eins og stungnir grísir þegar þau meðul sem sjóðurinn hyggst beita koma fram í dagsljósið. Bloggsíður hafa verið virkur miðill í þjóðfélagsumræðunni. Síðasta töfralausnin í umræðunni er Finnska leiðin, hipp hipp! Þegar verst var fór atvinnuleysi í Finnlandi í 30% og í Norður Finnlandi og Lapplandi í 50%. Takk, má ég biðja um eitthvað annað. Börn þessa fólks fremja ódæði í skólum í dag. Þetta kemur fram í viðtali við Sigurbjörgu Árnadóttur sem bjó í Finnlandi á þeim tíma sem heyra í þættinum Í mótbyr, korter um kreppuna sem fluttur var korter í tólf á rás eitt í dag og klukkan eitt á rás 2. Ég hvet alla til að hlusta á þetta viðtal. Hún hvetur til að reiði fólks verði virkjuð til að hjálpa til við að leysa ástandið og varar við tali um skyndilausnir. Aðdragandinn að kreppunni í Finnlandi var mjög líkur og við ættum að leggja eyrun að því sem gerðist þar.

Skeggrætt við Spora...

Undanfarna daga hefur mér ofboðið svo vaðallinn í fjölmiðlum að ég lét eftir mér að hringja á félaga Spora...

Erna: Spori! Spori! mannstu eftir móðuharðindunum??

Spori: Bnrrrr...!! Á hvaða öld ert þú eiginlega fædd Erna?? Er ekki í lagi með þig?

Erna: Já en Spori, forseti ASÍ segir að staðan hafi ekki verið alvarlegri síðan í Móðuharðindunum?

Spori: Ertu að segja mér að ég fái ekki hús og hey í vetur!!

Erna: Jú jú... en...

Spori: Ja þarna sérðu, ekki fengu klárarnir þá hús og hey svo mikið er víst....

Erna: Já auðvitað, alltaf ert þú með hlutina á hreinu. Þú ættir að skella þér í stjórnmálafræði

Spori: Bnrr..... kjams... hef engan tíma í svoleiðis, þegar ég er ekki að éta eða svofa er ég að kljást við Geisla eða hugsa um Smellu..., mundu svo eftir kögglunum handa mér..................

Galdrakallinn í Stykkishólmi

Fyrir tæpum 3 vikum brenndi ég í Stykkishólm til að heimsækja dr. Jósef og stóru sprautuna hans. Var orðin frekar slæm í bakinu. Árangurinn hefur ekki látið á sér standa þó sjálf þurfi ég að sinna betur því sem ég get gert.

Eitt stórt hrós til Bakdeildarinnar á spítalanum í Stykkishólmi. Þar hafa margir fengið bót bakvandamála og margfalda bót á lífsgæðum. Góða helgi.

Frækinn frambjóðandi og umönnun aldraðra...

Dætur mínar eru félagsmálafrömuðir. Linda bauð sig s.l. vetur fram til að leiða myndlistaklúbbinn í MR og í ritstjórn Loka. Hún fékk kosningu ásamt félögum sínum í bæði verkefnin og hefur í mörgu að snúast við þessi verkefni. Til viðbótar er hún að passa gömlu konurnar á Frúardeildinni á Grund aðra hverja helgi. Ekki veitir af að unglingar afli sér vasapeninga á þessum síðustu og verstu tímum. Hún er harla dugleg við þetta og líkar vel að sinna gömlu konunum

Handboltakappinn Selma bauð sig svo fram sem meðstjórnanda í nemendaráð Valhúsaskóla fyrir 8. bekk. Hún lagði mikið á sig við að semja ræðu sem var svo flutt í dag í Miðgarði yfir nemendum skólans. Ég er nú nokkuð stolt af þessu framtaki hjá þrettán ára stelpu.

Semsagt þó krónan falli þá er gott gengi á mínum stelpum....

Verðmerkingar

Ágæta blað

Undanfarið hef ég ítrekað orðið fyrir því að verðmerkingar í hillum matvöruverslana standast ekki. Skyldur verslana í þessu eru skýrar og réttur neytenda sömuleiðis. En það er auðvelt að slæva okkur neytendur á tíma óðaverðbólgu. Við getum jafnvel farið að vorkenna reynslulitlu starfsfólki sem þarf að kalla í verlsunarstjóra til að gera sjálfsagðar leiðréttingar fyrir smáupphæðum. En réttur okkar er ljós. Ég skora á Morgunblaðið að standa vaktina með okkur neytendum og fjalla um þessi mál. Einnig á alla þá sem starfa að málum neytenda að veita verslunum allt það aðhald sem þarf til að þessi mál verði í lagi. Ég tel eins og staðan er í dag að þetta sé eitt mesta hagsmunamál neytenda.

 

/Birtist í Velvakanda Morgunblaðsins 26. september