Um "styrkleika" kvenna ...

Í gær brunaði ég á Hvanneyri að kenna um hagfræði, ekki sérstaklega í frásögur færandi. En á þessum ferðum mínum á þessum árstíma hef ég komist á ótrúrlega góðar útsölur í Hyrnunni, Kringlu þeirra Borgfirðinga. Ég nældi í tvær Adidas peysur fyrir erfingjana í síðustu ferð en nú var komið að mér. Sem ég skunda þarna inn sé ég ÓTRÚLEGA flotta SKÓ! Já ef það er eitthvað sem ég er búin að læra að versla nánast eingöngu á útsölum eru það skór. Ég þræddi mig framhjá þeim í skeifnabúðina því erindið var jú að skóa eina af skyttunum þremur. En á bakaleiðinni var mér ekki mjakað lengra en að þessum skóm og er skemmst frá því að segja að ég skundaði með þá undir hendinni út úr Hyrnunni, sigri hrósandi yfir þessum kjarakaupum. Skórnir þeir eru semsagt á leiðinni á djammið í borginni og passa þetta litla vel við "prjónapilsið" mitt, hana Pífu.

Aðrar fréttir eru helst þær að eftir að hafa vikum saman farið seint að sofa, kom Linda sér endanlega í fullorðinna tölu með því að fara að drekka KAFFI!  Kastaði tólfunum í morgun þegar ég kom að henni eftir morgunsturtuna við að hella uppá. Ég benti henni nú í allri vinsemd á að kaffi kemur ekki í staðinn fyrir svefn.

Að lokum held ég að eitthvað sé að uppfræðslu unga fólksins í dag. Í spurningakeppni framhaldsskólanna í gær tókst hvorugu liðinu sem þar kepptu að svara því hvernig Adam og Eva klæddust í Paradís, eru fíkjublöð svona gersamlega komin úr tísku eða hvað

Athugasemdir

[Kristjana Bjarnadóttir, 15.1.2008 kl. 21:55]

Mikið er ég glöð að ungt fólk veit ekki hvernig Adam og Eva klæddust, meðan þetta er kennt sem sagnfræði á fólk ekki að vita þetta, best að gleyma þessu snarlega.

Ef þetta væri kennt sem bókmenntir eins og sagan um Egil Skallagrímsson fyndist mér eðlilegt að ungt fólk vissi þetta .

[Ásdís (IP-tala skráð) 16.1.2008 kl. 13:18]

Upprunalega held ég að þau hafi klæðst helst til engu. Laufinu var bætt inn af síðari tíma mönnum, siðsemi vegna.

[Erna Bjarnadóttir, 16.1.2008 kl. 15:06]

Já þá má velta fyrir sér hvernig þetta lítur út í nýju þýðingunni - kannske rabbarbari !! í stað fíkjublaðs